AF268: 87v

80 Bedenüñ bunlar iledür qāyim
İʿtidāl‑ile ḫoş ṭutar dāyim

81 Biri eksik ola ve‑yā artıq
Ḫāric‑i iʿtidāl olur ayrıq

82 İʿtidāli bunuñ ne birle olur
Ṣıḥḥat‑i ādemī ne birle olur

83 Bu ḥadīs̱i buyurdı çünki ḥabīb
Sözi cāmiʿ‑durur hem özi ṭabīb

qāla n‑nabīyu ʿalayhi s‑salāmu l‑miʿdatu [!] baytu kulli dāʾin wa‑l‑ḥimyatu kullu rāsin kullu dawāʾin

84 Çün miʿde dėnildi beyt‑i ʿanā
Ḫaẕer [!] ėt bulduġını qoyma aña

85 Ger mizāca müvāfıq ola ṭaʿām
Kes̱ret ile yėme vü gözle niẓām

86 Şol muḫālif ġıdādan eyle ḫaẕer [!]
Görmeyesin cihānda renc ü żarar

87 Ṣaġlıġuñ başı çün ṣaqınmaqdur
Eyle perhĭz bu sözlerüm ḥaqdur

88 Ṭıbbı cemʿ eylemiş bu sözde resūl
Ṭut sözümi ʿilelden olma melūl

89 Hem bu āyet buña muṭābıqdur
Her sözi āyete müvāfıqdur

qāla llāhu tabāraka wa‑taʿālā kulū wa‑šrabū wa‑lā tusrifū

90 Niʿmeti vėrdi çün yė iç dāyim
Dün ü gün ol ʿibādete qāyim

91 Līkin ėtme ṣaqın anı isrāf
Nıṣf‑i dīndür dėmişler el‑inṣāf

92 Bu sözi hem buyurmış Eflāṭūn
Qāyil oldı bu söze ehl‑i fünūn

qāla n‑nabīyu ʿalayhi s‑salāmu al‑ǧūʿu saḥābun yumṭiru l‑ʿilma wa‑l‑faṣāḥata wa‑š‑šabaʿu saḥābun yumṭiru l‑ǧahla wa‑l‑ġaflata

93 Açlıq bir seḥāb‑i raḥmetdür
Yaġan andan ʿilm ü feṣāḥatdür

94 Hem bu ṭoqlıq seḥāb‑i raḥmetdür
Yaġmurı daḫı cehl ü ġafletdür

95 Gerek‑ise seni saña cānā
Eyle perhĭz ġıdāda ṣubḥ u mesā

96 Ki nefāyis ola yă gül‑be‑şeker
Yėme qarnuñ ṭoq‑ise eyle ḥaẕer

97 Qurı nānı ger ac olub yiyesin
Niʿmet‑i ḫāṣṣ bu imiş diyesin

98 Ṣıḥḥatüñ başı çün ṣaqınmaqdur
Seni saña gerekse sen ṭoq ṭur